2026-yil 17-sentabr kuni O‘zbekiston respublika tovar-xom ashyo birjasi (UZEX) Boshqaruv raisi Asadulla Qayumov va Phillip Capital xalqaro investitsiya kompaniyasi Boshqaruv raisi Lim Xua Min o‘rtasida uchrashuv bo‘lib o‘tdi.

Uchrashuv davomida UZEX va Phillip Capital o‘rtasidagi strategik hamkorlikning joriy holati va istiqbollari, shuningdek, UZEX GLOBAL qo‘shma korxonasi faoliyatining ustuvor yo‘nalishlari va kelgusi vazifalari muhokama qilindi.

Taʼkidlanganidek, jahon tovar bozorlaridagi yuqori o‘zgaruvchanlik sharoitida narx xatarlarini boshqarishning zamonaviy vositalariga bo‘lgan ehtiyoj ortib bormoqda. Shu nuqtai nazardan, xalqaro fyuchers va derivativlar bozorlariga kirish imkoniyatlarini kengaytirish mahalliy biznes uchun muhim amaliy ahamiyat kasb etadi.

Zamonaviy xedjirlash infratuzilmasini shakllantirish mahalliy ishlab chiqaruvchilar, eksportyorlar va boshqa tovar bozori ishtirokchilariga narx o‘zgarishi bilan bog‘liq xatarlarni samarali boshqarish, moliyaviy natijalar barqarorligini oshirish va xalqaro bozorlarda raqobatbardoshlikni kuchaytirish imkonini beradi.

Tomonlar UZEX GLOBAL loyihasi doirasida mahalliy tadbirkorlar va bozor ishtirokchilarining moliyaviy savodxonligi hamda professional salohiyatini oshirish, xedjirlash va derivativlar bilan ishlash bo‘yicha o‘quv va amaliy dasturlarni rivojlantirish muhimligini qayd etdilar.

Shuningdek, UZEX GLOBAL faoliyati doirasida shakllanadigan amaliy tajriba va xalqaro amaliyot O‘zbekistonda milliy derivativlar bozorining normativ-huquqiy, texnologik va kadrlar salohiyatini rivojlantirish uchun muhim asos bo‘lib xizmat qilishi qayd etildi.

Uchrashuv yakunida tomonlar UZEX va Phillip Capital o‘rtasidagi strategik hamkorlikni izchil davom ettirish, UZEX GLOBAL faoliyatini yanada rivojlantirish va yangi qo‘shma tashabbuslarni amalga oshirish bo‘yicha hamkorlikni kuchaytirishga tayyor ekanliklarini bildirdilar.

Manba: Ommaviy kommunikatsiyalar va tashqi iqtisodiy faoliyat bo‘limi