Chikago tovar birjasi (CME Group) Phillip Capital xalqaro investitsiya kompaniyasi bilan hamkorlikda 18–19-avgust kunlari O‘zbekiston respublika tovar-xom ashyo birjasi (UZEX) uchun fyuchers bozorlari, narx tavakkalchiliklarini boshqarish va xedjirlash mexanizmlariga bag‘ishlangan xalqaro o‘quv vebinarlarini o‘tkazmoqda.

Tadbirdan ko‘zlangan asosiy maqsad UZEX mutaxassislari va bozor ishtirokchilarining fyuchers savdo vositalaridan samarali foydalanish, narx o‘zgaruvchanligi bilan bog‘liq tavakkalchiliklarni boshqarish hamda xalqaro tajribani O‘zbekiston sharoitida qo‘llash bo‘yicha bilim va amaliy ko‘nikmalarini oshirishdan iboratdir.

Vebinarlarda UZEX xodimlari, brokerlar, treyderlar va boshqa savdo ishtirokchilari, jumladan, tovar ishlab chiqaruvchilar, qayta ishlovchi korxonalar hamda boshqa tadbirkorlik subyektlari ishtirok etmoqda.

Vebinarning birinchi kunida fyuchers bozorlarining ishlash mexanizmlari va zamonaviy xedjirlash vositalari muhokama qilindi. CME Group ekspertlari global derivativlar bozori, kliring va risk-menejment, tartibga solish mexanizmlari, Globex elektron savdo platformasi haqida ma’lumot berdilar.

Shuningdek, UZEX va Phillip Capital hamkorligida tashkil etilgan “UZEX Global” qo‘shma korxonasining faoliyati, mahalliy tadbirkorlarning xalqaro tovar derivativlari bozorlariga chiqish imkoniyatlari hamda tovar bozori ishtirokchilari uchun samarali xedjirlash tizimini shakllantirish masalalariga alohida e’tibor qaratildi.

Ishtirokchilar UZEX Global orqali CME Group fyuchers bozorlarida ishtirok etish, fyuchers vositalaridan xedjirlash maqsadida foydalanish va tovarlar narxi o‘zgaruvchanligi bilan bog‘liq xavflarni kamaytirish usullari bilan tanishdilar.

Mazkur vebinarlar UZEXda milliy derivativlar bozorini shakllantirish strategiyasining muhim qismi bo‘lib, mahalliy bozor ishtirokchilarini fyuchers savdolariga tayyorlash, ularning moliyaviy savodxonligini oshirish hamda zamonaviy xedjirlash vositalaridan samarali foydalanish bo‘yicha bilim va ko‘nikmalarini shakllantirishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi