O'zbek
Ўзбек
Русский
English
YANGI KITOB OVOZASI
O‘zbekcha ohang, o‘zbekcha tafakkur, milliy til qolipi va mazmun...
Alisher Navoiy nomidagi Toshkent davlat o‘zbek tili va adabiyoti universitetida bo‘lib o‘tgan “Davlat tilida ish yuritish” amaliy qo‘llanmasining taqdimotida mazkur mavzularda batafsil so‘z yuritildi.
“O‘zbekiston nashriyoti” davlat unitar korxonasida nashr qilingan ushbu kitob – 4 bob, 528 sahifadan iboratdir.
O‘zbekiston Respublikasi Vazirlar Mahkamasining Davlat tilini rivojlantirish departamenti tomonidan O‘zbekiston Respublikasi Fanlar akademiyasi O‘zbek tili, adabiyoti va folklori instituti bilan hamkorlikda chop qilingan “Davlat tilida ish yuritish” amaliy qo‘llanmasi qayta to‘ldirilgan 9-nashrdir.
Ushbu kitobda tashkilot va muassasalarning ish yuritish faoliyatida eng ko‘p qo‘llanadigan hujjatlar, ularni tuzish tartib qoidalari masalalariga urg‘u berilgan, mazkur hujjatlar tegishli namunalar bilan ko‘rsatilgan, shuningdek, ish yuritishga oid lug‘atlar kiritilgan.
Qo‘llanma birinchi navbatda, tashkilotlar rahbarlari va xodimlariga, boshqaruv faoliyatida bevosita hujjat ustida ishlovchilar, kotib-referentlar, kadrlar xizmati xodimlariga mo‘ljallangan, shuningdek undan hisobchilar, adliya maslahatchilari, auditor, menejerlar ham foydalanishlari mumkin.
Yangi nashr taqdimotida so‘z chiqqanlar, mazkur to‘plamning bugungi kundagi zarurati va ahamiyati xususida batafsil to‘xtalib, uning davlat tili nufuzini oshirishdagi muhim qadam ekanini alohida e’tirof etishdi.
.jpg)
Vazirlar Mahkamasining Davlat tilini rivojlantirish departamenti bo‘lim mudiri Shahobiddin Musayev, mazkur yangi nashr bugunga qadar qariyb 4 mingdan ortiq nusxada chop etilib, ko‘plab davlat tashkiloti va muassasasalariga bepul tarqatilgani, kelgusida talab va extiyojga qarab yana nashr etilishini ma’lum qildi.
Ma’lumot o‘rnida: Vazirlar Mahkamasining Davlat tilini rivojlantirish departamenti tashabbusi bilan yaqinda 5 jilddan iborat “O‘zbek tilining izohli lug‘ati” ham chop etilgandi. Shuningdek, Davlat tilini rivojlantirish departamenti O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi bilan hamkorlikda “O‘zbekiston Respublikasi geografik obyektlari nomlarining davlat tilida yozilishi yo‘riqnomasi” hamda “Qoraqalpog‘iston Respublikasi geografik obyektlari nomlarining o‘zbek tilida yozilishi yo‘riqnomasi” kabi amaliy qo‘llanmalarini ham tayyorladi.
Tadbirda departament rahbariyati bu boradagi ezgu ishlar to‘xtab qolmasligi, joriy yil yakuniga qadar 10 dan ortiq shu yo‘nalishdagi kitoblar chop etilishi rejalashtirilganini bildirdi.
Umida Boyzoqova
Qurilish vazirining ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi
Manbaa: "O'zRTXB" AJ PR bo'limi