O‘zbekiston respublika tovar-xom ashyo birjasida domen nomlarini sotish bo‘yicha joriy qilingan yangi domain.uzex.uz elektron savdo platformasida dastlabki bitimlar tuzildi.

Xususan, o‘tgan davrda mazkur platformada 34,1 mln so‘mlik 51 ta domen nomlari sotilgan. Shaffoflik va bozor tamoyillari asosida o‘tkazilgan auksion savdolari natijasida domen nomlarining sotuv narxi ularning boshlang‘ich bahosiga nisbatan o‘rtacha 79,4% ga o‘sgan.

Taʼkidlash lozimki, “Premium” toifasidagi domen nomlari sunʼiy intellekt (SI)dan foydalaniladigan holda birja orqali sotiladi. Bunda, sunʼiy intellekt auksion ishtirokchilariga eng yaxshi variantlarni taklif qilish maqsadida domenlar bo‘yicha kalit so‘zlarning ommalashganligi, tendensiyalar va ularning dolzarbligi kabi omillarni tahlil qiladi.

Eslatib o‘tamiz, O‘zbekiston respublika tovar-xom ashyo birjasining domain.uzex.uz yangi elektron savdo platformasi 2024-yil 14-dekabrda ishga tushirgan.

Foydalanilmayotgan domen nomlari birjaning domain.uzex.uz elektron savdo tizimi savdolariga yagona integrator “UZINFOCOM” MChJ tomonidan qo‘yib kelinmoqda.

Manbaa: "O'zRTXB" AJ PR bo'limi