7 ноябрь куни Тошкент шаҳридаги “Hyatt Regency” меҳмонхонасида давлат харидлари соҳасини янада такомиллаштиришга бағишланган кенгайтирилган давра суҳбати ўтказилди.

Давра суҳбатида йирик давлат корхоналари, вазирлик ва идоралар, хусусий сектор вакиллари, маҳаллий ишлаб чиқарувчи корхоналар мутасаддилари иштирок этди.

Тадбирда давлат харидлари электрон тизимининг энг йирик ва тажрибали оператори – Ўзбекистон республика товар-хом ашё биржаси ҳам фаол қатнашди.

Ўзбекистон республика товар-хом ашё биржаси 2011 йилдан буён давлат харидлари электрон тизимини такомиллаштириб келмоқда. Мазкур тизим давлат харидлари шаффофлигини таъминлаш ва самарадорлигини оширишда муҳим аҳамиятни касб этади.

2025 йил 9 ойлик якунларига кўра биржанинг давлат харидлари бўйича xarid.uzex.uz электрон савдо тизимида ўтказилган савдолар натижасида 7,3 трлн сўмлик бюджет ва корпоратив буюртмачиларининг маблағлари тежалди. Электрон давлат харидларининг ҳажми эса ўтган йилнинг мос даврига нисбатан 31,2% га ошди.

Ўтган даврда савдо иштирокчиларига қўшимча қулайликлар яратиш ва давлат харидлари соҳасида янги мижозларни жалб қилиш мақсадида янги Xarid электрон давлат харидлари мобиль иловаси ишга туширилди.

Мобиль илова фойдаланувчиларга давлат харидлари доирасида электрон дўконда ва бошланғич нархни пасайтириш учун ўтказиладиган аукционда қатнашиш имкониятини тақдим этади.

Шунингдек, бизнес-жараёнларни оптималлаштириш ва иш самарадорлигини ошириш мақсадида Ўзбекистон республика товар-хом ашё биржаси сунъий интеллект (СИ) хизматларини жорий қила бошлади.

Хусусан, биржанинг электрон давлат харидлари тизимида мижозларни қўллаб-қувватлаш мақсадида сунъий интеллектга асосланган замонавий ечим бўлган AI Chat-bot хизмати жорий этилди.

Эндиликда xarid.uzex.uz платформасида авторизациядан ўтган фойдаланувчилар реал вақт режимида, биржанинг Call-марказига мурожаат қилмасдан, ўзларининг сўровларига тезкор жавоблар ва техник кўмак олишлари мумкин.

Рақамли ёрдамчи қонунчилик, тендер ўтказиш тартиби, ҳужжатларни расмийлаштириш, савдоларда иштирок этиш ва давлат харидларига оид бошқа масалалар бўйича тезкор маслаҳат ва тавсиялар беради.

Мазкур технологияни жорий этилиши мижозларни қўллаб-қувватлашни яхшилайди, тизим билан ўзаро алоқа қилиш жараёнини соддалаштиради ва савдо операцияларини бажаришда хатоларга йўл қўйиш эҳтимолини камайтиради.

Бундан ташқари, электрон давлат харидлари тизимида буюртмачи ва иштирокчилар эълонларини модерациядан ўтказишда сунъий интеллект (СИ) хизматидан ҳам фойдаланилмоқда.

Келгусида AI Chat-bot функцияларини кенгайтириш, сунъий интеллектнинг янги хизматларини жорий этиш ва уларни биржанинг бошқа электрон савдо платформаларига интеграция қилиш ишлари режалаштирилган.

Давлат харидлари иштирокчилари учун қўшимча қулайликлар яратиш мақсадида маҳаллий ишлаб чиқарувчилар учун товарлар каталогини шакллантириш механизми жорий қилинди ҳамда Ўзбекистон Республикаси Адлия вазирлигининг license.gov.uz электрон лицензиялаш тизими билан ахборот алмашинуви йўлга қўйилди.

Бу, ўз навбатида, маҳаллий тадбиркорлар ва товар етказиб берувчиларга маҳсулотларни биржанинг электрон давлат харидлари тизими xarid.uzex.uz га жойлаштириш ва сотиш жараёнларини енгиллаштиради.

Давлат харидлари тизимини такомиллаштириш мақсадида марказлашган харидлар ва фармацевтика тармоғи бўйича farma.uzex.uz ихтисослашган платформалар ишга туширилди ҳамда икки босқичли давлат харидлари тизимларининг ишга туширилиши кутилмоқда.

Шунингдек, биржада мулоқот ва жамоатчилик назоратининг самарали тизими жорий қилинган. Мисол учун, бугунги кунда биржада @uzexfeedbackbot ва @uzexanticorruptionbot телеграм ботлари фаол ишлаб келмоқда.

Давра суҳбатида давлат харидлари бўйича мавжуд муаммолар ва таклифлар муҳокама қилинди ва амалий ечимлар белгиланди.

Манба: Оммавий коммуникациялар ва ташқи иқтисодий фаолият бўлими