O‘zbekiston respublika tovar-xom ashyo birjasi yangi “Xarid” elektron davlat xaridlari mobil ilovasini ishga tushirdi.

Yangi ilova birja tomonidan elektron savdolarda ishtirokchilarga qo‘shimcha qulayliklar yaratish va davlat xaridlari sohasida yangi mijozlarni jalb qilish maqsadida yaratilgan.

Mobil ilova foydalanuvchilarga davlat xaridlari doirasida elektron do‘konda va boshlang‘ich narxni pasaytirish uchun o‘tkaziladigan auksionda qatnashish imkoniyatini taqdim etadi.

Xususan, ilova ishtirokchilarga elektron do‘konda narxlar so‘roviga taklifini qabul qilish va o‘z narx taklifini kiritish, shuningdek, tuzilgan shartnomalarni bekor qilish imkonini beradi.

Shuningdek, yangi mobil xizmat orqali davlat xaridlari buyurtmachilari tuzilgan shartnoma bo‘yicha to‘lovlarni amalga oshirish, shartnomalarni bekor qilish, tiklash va bajarilishini tasdiqlash imkoniyatiga ega bo‘ladi.

Umuman olganda, birjaning mobil ilovalari nafaqat kompaniyaning zamonaviy axborot resursi, balki mijozlarga xizmat ko‘rsatishning samarali vositasi hisoblanadi.

“Xarid” ilovasini Google Play orqali yuklab olish mumkin.

Manba: Ommaviy kommunikatsiyalar va tashqi iqtisodiy faoliyat bo‘limi