O‘zbekiston respublika tovar-xom ashyo birjasining davlat xaridlari bo‘yicha еtender.uzex.uz elektron savdo tizimida xaridlarni kuzatib borish bo‘yicha alohida “funksiya” qo‘shildi.

Buning uchun, davlat buyurtmachisi tomonidan “Komissiya aʼzolari”ni qo‘shish bo‘limida masʼul xodim maʼlumoti kiritilishi orqali xaridlarni kuzatib borish mumkin.

O‘z navbatida, davlat buyurtmachisi tomonidan qo‘shilgan “kuzatuvchi” o‘ziga tegishli elektron raqamli imzo (ERI) kalitidan foydalangan holda tegishli lot yuzasidan xarid jarayonini kuzatib borish imkoniyatidan foydalanadi.

Mazkur xizmatning joriy etilishi davlat buyurtmachilari uchun qo‘shimcha qulaylik yaratib, tashkilotlarda xaridlarning ochiqligi va shaffofligini taʼminlash ustidan nazorat o‘rnatishni kuchaytiradi.

Maʼlumot uchun: Eng yaxshi takliflarni tanlash va tender xarid qilish tartib-taomillarini amalga oshirish turlari hisoblanadi. Xaridlarni tanlash va tender shaklida amalga oshirish tartiblari O‘zbekiston Respublikasining “Davlat xaridlari to‘g‘risida”gi qonuni bilan belgilangan.

Manbaa: "O'zRTXB" AJ PR bo'limi