O‘zbekiston respublika tovar-xom ashyo birjasi elektron savdo tizimlarini takomillashtirish ishlarini davom ettirib kelmoqda.

Xususan, birjaning avtoraqam.uzex.uz savdo platformasida jismoniy shaxslar uchun “Humo” to‘lov tizimining plastik kartasidan foydalangan holda onlayn-auksionlarda ishtirok etish imkoniyati yaratildi.

Endilikda jismoniy shaxslar o‘zlarining shaxsiy kabinetida “Balans” bo‘limiga kirib, “Humo” plastik kartasini qo‘shishlari va savdolarda ishtirok etish uchun o‘z hisoblarini to‘ldirishlari mumkin.

Eslatib o‘tamiz, avtoraqamlarni onlayn-auksionlarda sotilishidan kelib tushgan mablag‘larning 80 foizi – O‘zbekiston Respublikasi Davlat budjetiga, 20 foizi – O‘zbekiston Respublikasi Ichki ishlar vazirligining moddiy-texnik bazasini rivojlantirish, xodimlarini moddiy rag‘batlantirish va boshqa xarajatlar Maxsus jamg‘armasiga yo‘naltiriladi.

Manba: Ommaviy kommunikatsiyalar va tashqi iqtisodiy faoliyat bo‘limi