Joriy yil yanvar-fevral oylarida “O‘zbekiston respublika tovar-xom ashyo birjasi” AJ Boshqaruvining 2023-yil 13-yanvardagi 6-sonli yig‘ilish bayoni bilan tasdiqlangan “O‘zbekiston respublika tovar-xom ashyo birjasi” AJ tomonidan 2023-yil davomida jismoniy va yuridik shaxslar bilan hududlarda o‘tkaziladigan sayyor qabullar” jadvaliga muvofiq birja rahbariyati tomonidan jismoniy va yuridik shaxslarni sayyor qabul qilish tashkillashtirildi.

Tasdiqlangan jadvalga muvofiq birja rahbariyati joylarda aholi va tadbirkorlar orasida muammolarni aniqlash, o‘rganish va ularni bartaraf etish maqsadida Qoraqalpog‘iston Respublikasi, Samarqand va Qashqadaryo viloyatlarida ochiq muloqot va sayyor qabul o‘tkazdi.

Tadbirlarda “O‘zbekiston respublika tovar-xom ashyo birjasi” AJ hududiy filiallarining boshqaruvchilari va mutaxassislari, brokerlari, kichik biznes va xususiy tadbirkorlik subyektlari, hamda elektron savdolarning boshqa ishtirokchilari qatnashdilar.

Uchrashuvlar davomida birja savdolari va elektron davlat xaridlarini tashkil etish tartib-taomillari, shuningdek bugungi kunda birja sohasida amalga oshirilayotgan o‘zgarishlar va yangiliklar bilan tanishtirib o‘tildi, birja mijozlariga yaratilayotgan sharoitlarga oid qabul qilingan hukumat qarorlarining mazmun va mohiyatini batafsil tushuntirib berildi.

Sayyor qabullarda tadbirkorlik subyektlarining faoliyatida birja sohasi bilan bog‘liq yuzaga kelayotgan muammo va kamchiliklarni ko‘rib chiqish, ularni bartaraf etish bo‘yicha takliflar ishlab chiqish orqali ularning birjadagi ishtirokini kengaytirish maqsadida ishtirokchilar tomonidan berilgan savollarga batafsil tushuntirish va tegishli javoblar berilib, bildirilgan taklif va mulohazalarni o‘z vaqtida hal etish lozimligi ta’kidlab o‘tildi.

Shundan so‘ng, sayyor qabullar davomida o‘z fikr va mulohazalarini bildira olmagan tadbirkorlik subyektlariga, ularni qiynayotgan muammolar bo‘yicha birjaning elektron pochta va telegram bot kanallari orqali murojaat qilishlari mumkinligini ta’kidlandi.

Murojaatlarning aksariyat qismi shu joylarning o‘zida hal etildi, qo‘shimcha o‘rganish talab etuvchi masalalar bo‘yicha tegishli chora-tadbirlar rejasini ishlab chiqildi.