2026-yil 18–22-oktabr kunlari O‘zbekiston respublika tovar-xom ashyo birjasining mobilraqam.uzex.uz elektron savdo platformasida jismoniy shaxslar o‘rtasida shaxsiy mobil raqamlarni oldi-sotdi qilish bo‘yicha dastlabki oltita bitim tuzildi. Tuzilgan bitimlarning umumiy qiymati 13,5 mln so‘mdan oshdi.

Elektron savdolar yakunlariga ko‘ra, g‘oliblar orasida Beeline kabi uyali aloqa operatorlarining mobil raqamlarini xarid qilgan jismoniy shaxslar bo‘ldi. Sotilgan raqamlar orasida oxirgi raqamlari esda qolarli kombinatsiyalardan iborat bo‘lgan, jumladan, «07 70», «77 77» kabi raqamlar ham mavjud.

Jismoniy shaxslar o‘rtasida dastlabki bitimlarning tuzilishi UZEX elektron savdo tizimini rivojlantirish yo‘lidagi navbatdagi bosqich bo‘ldi. Mazkur tizim foydalanuvchilarga shaxsiy mobil raqamlarni elektron auksionlar va «Tezkor bitim» xizmati orqali sotish hamda xarid qilish imkoniyatlarini kengaytirmoqda.

mobilraqam.uzex.uz platformasi savdolarda masofadan turib ishtirok etish, o‘zaro hisob-kitoblarni amalga oshirish hamda mobil raqamlarni onlayn tarzda qayta rasmiylashtirish imkonini beradi. Bu esa elektron savdolardan foydalanish imkoniyatlarini kengaytirish, bitimlar shaffofligini ta’minlash va jismoniy shaxslar o‘rtasida mobil raqamlar oldi-sotdisining qulay mexanizmini rivojlantirishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi