O‘zbekiston Respublikasi Prezidentining 2023-yil 12-maydagi PQ-156-son qaroriga muvofiq O‘zbekiston respublika tovar-xom ashyo birjasi birja savdolarida "yashil energiya" sertifikatlarini sotishga mo‘ljallangan alohida "yashil energetika seksiyasi" tashkil etilgan.

2025-yil 11-fevral kuni birjaning mazkur seksiyasida birinchi marta "yashil energiya" sertifikatlari eksport qilindi. "O‘zbekgidroenergo" AJ tomonidan birja savdolari orqali dastlabki 301 ta sertifikatlar eksportga sotildi.

"O‘zbekgidroenergo" AJ birja savdolarida mazkur sertifikatlarning sotuvchisi sifatida ishtirok etmoqda. Xususan, sotuvchi tomonidan birjada sertifikatlar uchun standart birja shartnomasi ochilgan. Bir dona "yashil energiya" sertifikati qayta tiklanuvchi energiya manbalaridan foydalangan holda 1000 kVt/soat elektr energiyasi ishlab chiqarilganligini tasdiqlaydi.

Eslatib o‘tamiz, sertifikatlar bo‘yicha o‘tkazilayotgan birja savdolarida xaridor sifatida yakka tartibdagi tadbirkorlar, mahalliy korxonalar yoki xorijiy kompaniyalar erkin ishtirok etishlari mumkin.

Manba: Ommaviy kommunikatsiyalar va tashqi iqtisodiy faoliyat bo‘limi