Surxondaryo viloyatidagi “Ayritom” erkin iqtisodiy zonasida O‘zbekiston respublika tovar-xom ashyo birjasining savdo maydonchasi o‘z faoliyatini boshladi.

Savdo maydonchasining asosiy maqsadi birja mexanizmlaridan foydalangan holda tadbirkorlar va tovar ishlab chiqaruvchilarning O‘zbekiston va Afg‘oniston bozorlariga erkin o‘zaro kirishni taʼminlashdan iboratdir.

Xususan, “Ayritom” EIZ hududida joylashgan savdo maydonchasi mahalliy tovar ishlab chiqaruvchilar va tadbirkorlarga mahsulotlarni birjaning elektron savdo tizimlari orqali Afg‘oniston bozorlariga samarali olib chiqish uchun noyob imkoniyatlar yaratib beradi.

O‘z navbatida, xorijiy kompaniyalar birja savdosi va elektron tijoratning afzalliklaridan foydalangan holda O‘zbekistonning tovar bozorlariga to‘g‘ridan-to‘g‘ri chiqish imkoniyatiga ega bo‘ladilar.

Mazkur afzalliklarga mijozlarga xizmat ko‘rsatishning yagona mexanizmi, amalga oshiriladigan savdo va hisob-kitoblarning shaffofligi, ishonchli tovar ishlab chiqaruvchilar bilan bevosita aloqa o‘rnatish, vaqt va mablag‘ tejamkorligi, shuningdek to‘lovlarni amalga oshirish va tovarni yetkazib berishning kafolatlash kabi ustunliklar kiradi.

“Ayritom” EIZ hududida savdo maydonchasining tashkil etilishi mahalliy ishlab chiqaruvchilarning eksport salohiyatini kengaytirish hamda O‘zbekiston va Afg‘oniston o‘rtasidagi savdo-iqtisodiy aloqalarni mustahkamlanishiga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi