Joriy yil 6-dekabr kuni O‘zbekiston respublika tovar-xom ashyo birjasi markaziy ofisida mamlakatimizda o‘tkazilayotgan Aksilkorrupsiya oyligi doirasida “9-dekabr – Xalqaro korrupsiyaga qarshi kurash” kuniga bag‘ishlangan “Ochiq eshiklar kuni” bo‘lib o‘tdi.

Tadbirda O‘zbekiston respublika tovar-xom ashyo birjasi va ommaviy axborot vositalari vakillari ishtirok etishdi.

“Ochiq eshiklar kuni”da mamlakatimizda korrupsiyaga qarshi kurashish borasida olib borilayotgan davlat siyosati va uning ustuvor yo‘nalishlari, birja sohasida korrupsiyaga qarshi kurashish bo‘yicha joriy etilgan zamonaviy tizim hamda birja mexanizmlarning korrupsiyaga qarshi kurashishda tutgan o‘rni to‘g‘risida maʼruzalar, taqdimotlar va muhokamalar o‘tkazildi.

Xususan, O‘zbekistonda korrupsiyaga qarshi kurash sohasida amalga oshirilayotgan keng ko‘lamli ishlar to‘g‘risida maʼruza qilindi.

Taʼkidlanganidek, O‘zbekistonning yangilangan siyosati jamiyatda adolat va qonun ustuvorligini oliy darajaga ko‘tarish, zamonaviy va samarali davlat boshqaruvini joriy etish, davlat xizmatida korrupsiyaviy holatlarning har qanday ko‘rinishlariga qatʼiy murosasizlik madaniyati shakllanmoqda.

Shu bilan birga, bugungi kunda korrupsiyaga qarshi kurashish sohasidagi davlat siyosati O‘zbekiston Respublikasi Prezidentining 2023-yil 11-sentabrda 158-son farmoni bilan qabul qilingan “O‘zbekiston — 2030” strategiyasida ham o‘z aksini topgan.

Bugungi kunda korrupsiyaga qarshi kurashish sohasida ijobiy yutuqlarga erishgan rivojlangan davlatlarning bu boradagi tajribasi shuni ko‘rsatmoqdaki, korrupsiya ko‘rinishlarining oqibati bilan emas, balki uni keltirib chiqarayotgan sabablarni va shart-sharoitlarni bartaraf etishga asosiy eʼtibor qaratilganligi o‘z samarasini bermoqda.

Shu munosabat bilan targ‘ibot va taʼlim hamda korrupsiyani oldini olish korrupsiyaga qarshi kurashish sohasidagi davlat siyosatining ustuvor yo‘nalishlaridan biri hisoblanadi.

Tadbirda, shuningdek, so‘nggi yillarda birja savdolari bo‘yicha ochiqlik, shaffoflikni va oshkoralikni taʼminlashga qaratilgan choralar hamda mamlakatimizda korrupsiyaga qarshi kurashishda birjaning tutgan o‘rniga to‘xtalib o‘tdi.

Taʼkidlanganidek, bugungi kunda O‘zbekiston respublika tovar-xom ashyo birjasining faoliyati ISO 37001:2016 “Korrupsiyaga qarshi kurashish menejmenti tizimi” xalqaro standart talablariga to‘liq javob beradi.

Birja nafaqat bozor iqtisodiyotining muhim infratuzilmasi balki, yashirin iqtisodiyot va korrupsiya elementlarini bartaraf etishning samarali vositasi ham hisoblanadi. Bunda shaffoflik va oshkoralik zamonaviy IT-texnologiyalar yordamida birjaning barcha savdo tizimlarida, birja savdolari va onlayn-auksionlarning har bir bosqichida taʼminlanadi.

Birja savdolari platformasi va elektron tijorat savdo tizimlarida o‘tkaziladigan savdolar va o‘zaro hisob-kitoblar jarayonlarining shaffofligi ommaviy axborot vositalari, birjaning rasmiy vebsayti, ijtimoiy tarmoqlardagi sahifalari, savdo ishtirokchilarning shaxsiy kabinetlari va boshqa resurslar orqali taʼminlanadi.

Xususan, mamlakatimiz aholisi va tadbirkorlari birja savdolariga qo‘yilayotgan mahsulotlarning hajmlari, birja kotirovkalari, davlat xaridlari bo‘yicha eʼlonlar, o‘tkazilgan savdo natijalari to‘g‘risidagi maʼlumotlardan erkin foydalanishlari hamda auksion jarayonlarini onlayn tarzda kuzatishlari mumkin.

Elektron savdolarda ishtirok etishda muammolarga duch kelgan holda fuqarolar va tadbirkorlar @uzexfeedbackbot, korrupsiya holatlari bo‘yicha esa @uzexanticorruptionbot telegram-botlari orqali murojaat qilishlari mumkin.

Tadbir faol muhokama tarzida o‘tdi, O‘zbekiston respublika tovar-xom ashyo birjasi mutaxassislari jurnalistlar va boshqa tadbir ishtirokchilarining qiziqtirgan savollariga javob berishdi.

Manba: Ommaviy kommunikatsiyalar va tashqi iqtisodiy faoliyat bo‘limi