Joriy yil 17-mart kuni O‘zbekiston respublika tovar-xom ashyo birjasi O‘zbekiston Respublikasi Bosh prokuraturasi hamda O‘zbekiston Respublikasi Korrupsiyaga qarshi kurashish agentligi bilan hamkorlikda mamlakatimizda korrupsiyaga qarshi kurashish bo‘yicha olib borilayotgan siyosat va qonunchilik tizimidagi yangiliklar bilan xodimlarni tanishtirish maqsadida amaliy seminar o‘tkazdi.

“O‘zbekiston respublika tovar xom-ashyo birjasi” AJ Komplayens-nazorat va axborot xavfsizligi bosh boshqarmasi tomonidan tashkil etilgan yig‘ilishda birjaning markaziy apparat xodimlari bilan birga videokonferensiya dasturi orqali hududiy filiallar xodimlari ham ishtirok etdilar.

Tadbirda O‘zbekiston Respublikasi Bosh prokuraturasi boshqarma katta prokurori Ravshan Nurbekov ishtirokchilarga O‘zbekistonning yangilangan siyosati jamiyatda adolat va qonun ustuvorligini oliy darajaga ko‘tarish, zamonaviy va samarali davlat boshqaruvini joriy etish, davlat xizmatida korrupsiyaviy holatlarning har qanday ko‘rinishlariga qatʼiy murosasizlik madaniyatini shakllantirib borish maqsadida keng ko‘lamli ishlar amalga oshirilayotganligini aytib o‘tdi.

Jumladan, joriy yilning 5-mart kuni O‘zbekiston Respublikasi Prezidenti Shavkat Mirziyoyev raisligida korrupsiyaning oldini olish bo‘yicha ishlar natijadorligi va kelgusidagi ustuvor vazifalarga bag‘ishlangan kengaytirilgan yig‘ilish o‘tkazilgani va yig‘ilishda sohada amalga oshirilishi lozim bo‘lgan asosiy vazifalar belgilab berilganligi haqida maʼlumot berdi.

Xususan, to‘g‘ridan-to‘g‘ri xaridlarni 2 karra qisqartirish, yil yakunigacha sunʼiy intellekt yordamida davlat xaridlarida qonunga zid holatlarni aniqlash va oldini olish bo‘yicha elektron tizimni ishga tushirish, ekspert komissiyasi tuzish va ushbu komissiya tomonidan ilg‘or tajriba asosida davlat xaridlarida tovarlarning o‘rtacha bozor narxlari ko‘rinib turadigan elektron platforma yaratish, byudjet va byudjetdan tashqari mablag‘ hisobidan asosiy vositalarni xarid qilish bo‘yicha talablarni kuchaytirish, investitsiya loyihalarida xalqaro korrupsiyaga qarshi standartlarni joriy etish, yirik auksion shartlarini raqobatdoshlik ekspertizasidan o‘tkazish va boshqalar to‘g‘risida maʼlumotlar berildi.

Tadbirda shuningdek O‘zbekiston Respublikasi Korrupsiyaga qarshi kurashish agentligining masʼul xodimi Mironshox Rasulov korrupsiyaga qarshi kurashish borasida xorijiy davlatlar tajribasi to‘g‘risida maʼruza qildi.

Maʼruza davomida korrupsiyaga qarshi kurashishning ikki xil usuli (repressiv va preventiv) to‘g‘risida xorijiy mamlakatlar Xitoy, Eron, BAA, Singapur, Fransiya, Avstraliya, AQSH va boshqa davlatlar misolida seminar ishtirokchilariga tushuntirishlar berildi.

Shu bilan birga, korrupsiyaga qarshi kurashishda sunʼiy intellekt yutuqlaridan foydalanish bo‘yicha Xitoy Xalq Respublikasi sezilarli yutuqlarga erishganligi alohida taʼkidlab o‘tildi.

Jumladan, 2012-yilda Zero Trust platformasi orqali 64 mln. davlat xizmatchilari o‘rtasida 8 721 mansabdor shaxslar korrupsiyaviy jinoyatlar sodir etganligi aniqlanganligi ham taʼkidlandi.

Bugungi kunda korrupsiyaga qarshi kurashish sohasida ijobiy yutuqlarga erishgan rivojlangan davlatlarning bu boradagi tajribasi shuni ko‘rsatmoqdaki, korrupsiya ko‘rinishlarining oqibati bilan emas, balki uni keltirib chiqarayotgan sabablarni va shart-sharoitlarni bartaraf etishga asosiy eʼtibor qaratilganligi o‘z samarasini bermoqda.

Tadbir davomida, shuningdek, korrupsiyaga qarshi kurashish sohasida erishilgan yutuqlar va kutilayotgan o‘zgarishlar to‘g‘risida batafsil maʼlumotlar berildi.

Seminar yakunida birja xodimlari o‘zlarini qiziqtirgan savollarga javob oldilar.

Manba: Ommaviy kommunikatsiyalar va tashqi iqtisodiy faoliyat bo‘limi