Joriy yilning 1-mayidan 21-mayigacha “O‘zbekiston respublika tovar-xom ashyo birjasi” AJning barcha hududiy filiallari tomonidan “Davlat xaridlarida xarid.uzex.uz elektron tizimining savdo turlari va imkoniyatlari” mavzusida davlat buyurtmachilari hamda tadbirkorlar uchun qator amaliy seminarlar tashkil etildi.

Tadbirlardan ko‘zlangan asosiy maqsad O‘zbekiston Respublikasi Prezidentining 2025-yil 26-dekabrdagi “Davlat xaridlari tizimida raqobat muhiti va shaffoflikni ta’minlash bo‘yicha navbatdagi chora-tadbirlar to‘g‘risida”gi PF–259-son Farmonining mazmun-mohiyatini keng jamoatchilikka yetkazish, shuningdek, davlat xaridlari sohasida yaratilgan yangi imkoniyat va qulayliklar haqida atroflicha ma’lumot berishdan iborat bo‘ldi.

Ta’kidlanganidek, mazkur Farmon bilan davlat xaridlari tizimini tubdan takomillashtirish, ochiqlik va raqobat muhitini kuchaytirish, mahalliy ishlab chiqaruvchilarni qo‘llab-quvvatlash hamda byudjet mablag‘laridan samarali foydalanishni ta’minlashga qaratilgan ustuvor vazifalar belgilab berilgan.

Xususan, seminar ishtirokchilariga davlat xaridlarining yangi tartiblari, mahalliy ishlab chiqaruvchilar uchun yaratilgan imkoniyatlar, elektron savdolardagi yangiliklar, ishonchnomalarni elektron shaklda rasmiylashtirish tartibi hamda birjaning barcha savdo platformalari faoliyati yuzasidan batafsil tushuntirishlar berilmoqda.

Jumladan agro.uzex.uz, yarmarka.uzex.uz va farma.uzex.uz elektron savdo platformalarining imkoniyatlari, ular orqali savdolarda ishtirok etish tartibi va amaliy jihatlari yuzasidan taqdimotlar o‘tkazildi.

Bundan tashqari, birjaning davlat xaridlari elektron tizimida sun’iy intellektga asoslangan zamonaviy servislar joriy etilib, xarid jarayonlarini yanada soddalashtirish va tezlashtirishga xizmat qilayotgani qayd etildi.

Jamoatchilik nazorati va ochiq muloqotni ta’minlash maqsadida maxsus Telegram-botlar – @uzexfeedbackbot va @uzexanticorruptionbot orqali murojaatlar qabul qilinishi yo‘lga qo‘yilgan.

Shuningdek, tadbir ishtirokchilariga davlat xaridlarida ishtirok etish jarayonlarini samarali tashkil etish bo‘yicha amaliy tavsiyalar berildi.

Seminarlar ochiq muloqot shaklida o‘tkazilib, soha mutaxassislari tinglovchilarning barcha qiziqtirgan savollariga javob berishdi.

Manba: Ommaviy kommunikatsiyalar va tashqi iqtisodiy faoliyat bo‘limi