2024-yil 14-19-oktabr kunlari O‘zbekiston respublika tovar-xom ashyo birjasining Qoraqalpog‘iston, Xorazm, Andijon, Farg‘ona, Namangan, Navoiy, Buxoro, Sirdaryo, Jizzax, Samarqand, Toshkent, Qashqadaryo va Surxondaryo hududiy filiallarida “Xalqchil IPO” dasturi doirasida “O‘zbekiston respublika tovar-xom ashyo birjasi” AJ aksiyalarini ommaviy joylashtirishga bag‘ishlangan Roadshow taqdimotlari bo‘lib o‘tdi.

Roadshow taqdimotlari davomida “O‘zbekiston respublika tovar-xom ashyo birjasi” AJ rahbariyati tomonidan birjaning so‘nggi yillardagi rivojlanish dinamikasi va o‘rta muddatli istiqboldagi rivojlantirish strategiyasi to‘g‘risida batafsil maʼlumotlar berildi.

Xususan, yaqin kelajakda birja tomonidan birja savdolarining shaffofligi va axborot xavfsizligini taʼminlash, savdo infratuzilmasini modernizatsiya qilish, savdo tizimlarini takomillashtirish, birja xodimlari va aʼzolarining malakasini oshirish, shuningdek, birja savdolarining shaffofligini taʼminlash hamda yangi savdo vositalarini joriy qilishga alohida eʼtibor qaratilishi taʼkidlandi.

Shuningdek, tadbirlar ishtirokchilariga birjaning afzalliklari va so‘nggi yutuqlari, shu jumladan kompaniyaning moliyaviy-iqtisodiy ko‘rsatkichlari hamda to‘langan dividendlar to‘g‘risidagi maʼlumotlar aks ettirilgan videorolik namoyish etildi.

“KAP DEPO” anderrayter – investitsiya kompaniyasining vakillari kompaniya faoliyati haqida batafsil to‘xtalib, “O‘zbekiston respublika tovar-xom ashyo birjasi” AJ aksiyalarini sotib olish bo‘yicha “Xalqchil IPO”da ishtirok etish tartibini tushuntirib berishdi.

Taʼkidlash joizki, “Xalqchil IPO”da “O‘zbekiston respublika tovar-xom ashyo birjasi” AJ ustav fondidan 4,44 foiz aksiyalarni sotish ko‘zda tutilgan. Shu bilan birga, joylashtirish bo‘yicha narx oralig‘i har bir aksiya uchun 12 900 so‘mdan 18 000 so‘mgacha bo‘lib, arizalarni qabul qilish 2024-yil 28-oktabrgacha davom etadi.

“O‘zbekiston respublika tovar-xom ashyo birjasi” AJ aksiyalarini sotib olish uchun arizalarni “E-AUKSION” elektron savdo maydonchasi, “GO INVEST” va “MULTICARD” mobil ilovalari yoki KAP DEPO investitsion kompaniyasiga murojaat qilish orqali berish mumkin.

Roadshow taqdimotlarida tadbir ishtirokchilari o‘rtasida fikr almashuvi bo‘lib o‘tdi va anderrayter vakillari birja xodimlari va brokerlarining qiziqtirgan savollariga javob berdilar.

Manba: Ommaviy kommunikatsiyalar va tashqi iqtisodiy faoliyat bo‘limi