2024 yil 14-dekabrdan O‘zbekiston respublika tovar-xom ashyo birjasi domen nomlarini sotish bo‘yicha yangi domain.uzex.uz elektron savdo platformasini ishga tushirdi.

Mazkur platformada xaridorgir harflar va raqamlar kombinatsiyasiga ega bo‘lgan «.UZ» domenidagi foydalanilmayotgan domen nomlari ochiqlik va bozor tamoyillari asosida boshlang‘ich narxni oshirish onlayn-auksionlar o‘tkaziladi.

Foydalanilmayotgan domen nomlari birjaning domain.uzex.uz elektron savdo tizimi savdolariga yagona integrator «UZINFOCOM» MCHJ tomonidan qo‘yiladi.

Eslatib o‘tamiz, joriy yilning aprel oyida «O‘zbekiston respublika tovar-xom ashyo birjasi» AJ va Yagona integrator «UZINFOCOM» MCHJ o‘rtasida o‘zaro hamkorlik memorandumi imzolangan edi.

Maʼlumot uchun: UZINFOCOM davlat axborot tizimlarini yaratish va qo‘llab-quvvatlash bo‘yicha yagona integrator va .UZ domeni maʼmuri hisoblanadi.

Manba: Ommaviy kommunikatsiyalar va tashqi iqtisodiy faoliyat bo‘limi