Ozarbayjonning Boku shahrida ilk bor “O‘zbekiston respublika tovar-xom ashyo birjasi” AJ ning xorijiy savdo maydonchasi ochildi. Birjaning yangi xorijiy savdo maydonchasi ta’sischisi Ozarbayjonning “Delfin Caspian” MChJ kompaniyasi bo‘ldi.

Mazkur savdo maydonchasi joriy yil 17 mayda O‘zbekiston respublika tovar-xom ashyo birjasi faoliyatini takomillashtirishga bag‘ishlangan O‘zbekiston Respublikasi Prezidentining yig‘ilishida belgilangan vazifalarni ijro etish doirasida ochildi.

Ozarbayjon Respublikasida birjaning savdo maydonchasi ochilishidan ko‘zlangan asosiy maqsad, birja savdolarining bozor mexanizmi imkoniyatlaridan foydalangan holda tadbirkorlar va tovar ishlab chiqaruvchilarining ikki davlat tovar bozorlarida erkin ishtirok etishlarini ta’minlashdir.

Birjaning elektron savdo tizimlari savdo va hisob-kitoblarning shaffofligi, ishonchli tovar ishlab chiqaruvchilar bilan bevosita aloqa o‘rnatish, vaqt va mablag‘ tejamkorliligi, shuningdek to‘lovlarni va tovarni yetkazib berishning kafolatlash kabi afzalliklarga ega.

Shunday qilib, hozirgi kunda "O‘zbekiston respublika tovar-xom ashyo birjasi" AJ xalqaro savdo tarmog‘i 21 ta xorijiy savdo maydonchalaridan iborat.

Manba: Ommaviy kommunikatsiyalar va tashqi iqtisodiy faoliyat bo‘limi