26-aprel kuni “INNOPROM Markaziy Osiyo” xalqaro sanoat koʻrgazmasi doirasida Oʻzbekiston respublika tovar-xom ashyo birjasining taqdimoti boʻlib oʻtdi.

Taqdimotda tadbir ishtirokchilari Oʻzbekistonda birja savdosi va elektron tijorat sohasida erishilgan soʻnggi yutuqlar bilan tanishdilar.

Tashqi savdo operasiyalarini amalga oshirishda birja mexanizmlarining imkoniyatlari namoyish etildi. Birjada tashqi savdo bitimlarini tuzishda xorijiy kompaniyalar komissiya toʻlovlari va garov mablagʻlarini kiritishdan ozod etilganligi qayd etildi.

Shuningdek, 25-27-aprel kunlari Rossiyaning "Agroeksport" federal markazi tomonidan Toshkent shahrida Ishbilarmonlik missiyasi tashkil etilib, uning doirasida Rossiyaning eksportchi korxonalari va “Oʻzbekiston respublika tovar-xom ashyo birjasi” AJ oʻrtasida ishbilarmonlik uchrashuvlari boʻlib oʻtdi.

Tadbirda, shuningdek, birja savdo platformalarining taqdimoti oʻtkazildi, hamda oʻzaro hisob-kitoblarning oʻziga xos xususiyatlari va birja tovarlarini yetkazib berish shartlari haqida ham batafsil maʼlumotlar berildi.

B2B-shaklida oʻtkazilgan muzokaralarda zamonaviy birja mexanizmlaridan foydalangan holda Oʻzbekiston va Rossiya oʻrtasidagi oʻzaro hamkorlikni kengaytirish masalalari muhokama qilindi.

 

Manba: Ommaviy kommunikatsiyalar va tashqi iqtisodiy faoliyat bo‘limi