2024-yilning 18-aprel kuni Samarqand shahrida Mustaqil Davlatlar Hamdo‘stligi Xalqaro birjalar uyushmasining (MDH XBU) yillik Umumiy yig‘ilishi bo‘lib o‘tdi. Joriy yilda ushbu tadbirga O‘zbekiston respublika tovar-xom ashyo birjasi mezbonlik qildi.

Majlisda Rossiya, Belarus, Ozarbayjon, Qozog‘iston, O‘zbekiston, Qirg‘iziston, Tojikiston va Armaniston mamlakatlari yirik birjalarining 40 dan ziyod rahbarlari va mutaxassislari ishtirok etdilar.

Tadbirda, shuningdek, Turkmaniston davlat tovar-xomashyo birjasi va AAEEX tovar birjasi (XXR) vakillari taklif etilgan mehmonlar sifatida ishtirok etishdi.

Uchrashuv davomida birjalararo hamkorlikni yanada rivojlantirishning dolzarb masalalari, MDH mamlakatlarida birjalarni rivojlantirishning zamonaviy tendensiyalari, shuningdek, birja savdolari va moliya bozorlari sohasidagi istiqbolli loyihalar muhokama qilindi.

Bundan tashqari, yig‘ilish ishtirokchilari MDH XBU Ijroiya direksiyasining hisoboti, Taftish komissiyasining xulosasi, hamda tashkilotning 2023-yildagi moliyaviy-xo‘jalik faoliyati yakunlari bo‘yicha yillik hisobotini tasdiqlashdi.

MDH Davlatlari Xalqaro Birjalar Uyushmasi (MDH XBU) aʼzolarining yillik umumiy yig‘ilishi doirasida MDH XBU Tovar bozorlari qo‘mitasining navbatdagi yig‘ilishi ham bo‘lib o‘tdi. Unda Qozog‘iston (YETS birjasi, Kaspiy birjasi), Rossiya (Milliy tovar birjasi), Belarus Respublikasi (Belarus universal tovar birjasi), O‘zbekiston (O‘zbekiston respublika tovar-xom ashyo birjasi) va Qirg‘iziston (Qirg‘iziston fond birjasi) kabi mamlakatlarning 6 ta birja vakillari ishtirok etdi.

 

Maʼlumot uchun: Mustaqil Davlatlar Hamdo‘stligi Birjalari Xalqaro Uyushmasi (MDH BXU) 2000-yil aprel oyida Moskvada uyushgan moliya bozorlarini xalqaro standartlarga muvofiq rivojlantirish ishlarini muvofiqlashtirish maqsadida tuzilgan. O‘zbekiston respublika tovar-xom ashyo birjasi 2004-yildan buyon MDH BXU aʼzosi hisoblanadi.

Manba: Ommaviy kommunikatsiyalar va tashqi iqtisodiy faoliyat bo‘limi