«Fitch Ratings» xalqaro reyting agentligi O‘zbekiston respublika tovar-xom ashyo birjasining prognozini “barqaror” dan “ijobiy” ga oshirdi va kompaniyaning xalqaro reytingini “B” darajasida tasdiqladi.

O‘zbekiston respublika tovar-xom ashyo birjasi prognozining yaxshilanishiga birja kontragentlarida tavakkalchilik darajasining pasayganligi va O‘zbekistonning uzoq muddatli suveren kredit reytingini ko‘tarilganligi ijobiy taʼsir ko‘rsatgan.

Agentlik tomonidan o‘tkazilgan baholashda, shuningdek, birjaning qarz mablag‘lari talab etmaydigan ishonchli biznes-modeli, past moliyaviy tavakkalchilik darajasi, korporativ qarzdorligining yo‘qligi, barqaror rentabellik ko‘rsatkichlari hamda birjaning O‘zbekistonda bozor munosabatlarini rivojlantirish va ochiq raqobatni taʼminlashda tutgan muhim ahamiyati hisobga olingan.

Mazkur xalqaro reyting O‘zbekiston respublika tovar-xom ashyo birjasining ochiq biznes strategiyasi, shaffof moliyaviy hisoboti va rivojlangan korporativ boshqaruvini tasdiqlaydi, hamda mahalliy mijozlar va xalqaro investorlarning birja faoliyatiga nisbatan bo‘lgan ishonchini oshiradi.

Maʼlumot uchun: “Fitch Ratings” - Amerika korporatsiyasi bo‘lib, xalqaro reyting agentligi sifatida tanilgan. Kompaniya jahon kredit bozorlarini mustaqil va istiqbolli kredit reytinglari, tushunchalar va maʼlumotlar bilan taʼminlashga ixtisoslashgan.

Manba: Ommaviy kommunikatsiyalar va tashqi iqtisodiy faoliyat bo‘limi