O‘zbekiston respublika tovar-xom ashyo birjasida o‘zbek birjasining xalqaro birjalar hamda xorijiy hamkorlar bilan aloqalarni mustahkamlash va kengaytirish bo‘yicha kompleks ishlar olib borilmoqda.

Xususan, MDH Xalqaro birjalar assotsiatsiyasi, Yevro-Osiyo fond birjalari federatsiyasi (FEAS) va Xalqaro fyuchers assotsiatsiyasi (AFM) bilan o‘zaro hamkorlik kuchaytirilmoqda.

Erishilgan kelishuvlar doirasida zamonaviy birja savdolarini tashkil etish bo‘yicha tajriba almashinuvi yo‘lga qo‘yildi, qo‘shma loyihalarni amalga oshirishga bag‘ishlangan seminar va uchrashuvlar tashkil etilmoqda, brokerlik kontoralari o‘zaro akkreditatsiyadan o‘tkazilmoqda va yangi xorijiy savdo maydonchalari ochilmoqda.

Yangi xorijiy savdo maydonchalarini ochishdan ko‘zlangan asosiy maqsad birja savdolarining bozor mexanizmlaridan foydalangan holda tadbirkorlar va tovar ishlab chiqaruvchilarning O‘zbekiston va boshqa davlatlar bozorlariga erkin kirishini ta’minlashdan iboratdir.

Shu bilan birga birjada chet ellik mutaxassislar bilan birja savdolarining yangi instrumentlarini tashkil etish bo‘yicha hamkorlik yo‘lga qo‘yilgan. Xalqaro ekspertlar mahalliy mutaxassislar va brokerlarga O‘zbekistonda hosilaviy vositalarni o‘zlashtirish, bu bozordagi xatarlarni aniqlash va hosilaviy bozor imkoniyatlari bo‘yicha tavsiyalar bilan bo‘lishmoqda.

Bu borada xalqaro ekspert Artur Axmadshin bilan konsalting xizmatlarini ko‘rsatish bo‘yicha kelishuv imzolangan. AQSHning “Broker-Junction LLC” brokerlik kompaniyasi rahbari Armin Fatxi bilan treyderlarni o‘qitish sohasida hamkorlik yo‘lga qo‘yilgan.

Bundan tashqari, O‘zbekiston Respublikasining AQSHdagi elchixonasi ko‘magida AQSH Savdo vazirligining Tijorat huquqini rivojlantirish dasturi (CLDP) maslahatchisi Maykl Kofild (Michael Cofield) va Tovar fyuchers savdolari bo‘yicha komissiyasi (CFTC) direktorining o‘rinbosari Kevin Pikkoli (Kevin Piccoli) bilan maslahatlashuvlar davom ettirilmoqda.

O‘z navbatida, xalqaro tashkilotlar va ekspertlar bilan hamkorlik birja savdolarining me’yoriy-huquqiy bazasini takomillashtiradi va O‘zbekistonda birja faoliyatini yanada rivojlantirishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi