O‘zbekiston Respublikasi Prezidentining 2023-yil 12-dekabrdagi "Qishloq xo‘jaligida erkin bozor munosabatlarini yana-da rivojlantirishning qo‘shimcha chora-tadbirlari to‘g‘risida"gi PF-205-son Farmoni ijrosini taʼminlash doirasida respublikamizning barcha hududlarida fermerlar va klasterlar uchun o‘quv-amaliy seminarlar boshlandi.

Seminarlar tasdiqlangan grafiklarga muvofiq O‘zbekiston Respublikasi Qishloq xo‘jaligi vazirligi, O‘zbekiston Savdo-sanoat palatasi, O‘zbekiston respublika tovar-xom ashyo birjasi, O‘zbekiston fermer, dehqon xo‘jaliklari va tomorqa yer egalari kengashi, Qishloq xo‘jaligini davlat tomonidan qo‘llab-quvvatlash Jamg‘armasi, «Agrobank» ATB va boshqa idoralarning masʼul xodimlaridan iborat Ishchi guruhlari tomonidan o‘tkazilmoqda.

O‘quv-amaliy seminarlarni o‘tkazishdan ko‘zlangan maqsad O‘zbekiston Respublikasi Prezidentining 2023 yil 12 dekabrdagi PF-205-son Farmoni mazmun-mohiyati va ahamiyatini, shuningdek, birjada ishtirok etish tartibini tushuntirishdan iboratdir.

Tadbirlar davomida fermerlar va klasterlarga paxtachilik tarmog‘ida bozor tamoyillari asosida yo‘lga qo‘yilayotgan yangi tizim bo‘yicha maʼruzalar va taqdimotlar o‘tkazilmoqda. Xususan, paxta xomashyosini O‘zbekiston respublika tovar-xom ashyo birjasining ochiq birja savdolari orqali fyuchers shartnomalari asosida sotish tartibi batafsil tushuntirilmoqda.

Shuningdek seminarlar qatnashchilariga birjada ro‘yxatdan o‘tish, hisobvaraqlarini ochish, brokerlik xizmatlaridan foydalanish, mahsulotlarni birja savdolariga qo‘yish va sotish tartiblari videorolik va taqdimotlar shaklida o‘rgatilmoqda. Bunda, birja, broker, treyder tushunchalari hamda fyuchers va spot birja savdolarining mazmun-mohiyati keng ochib berilmoqda.

Tadbirlarda mamlakatimizning har bir tumanida faoliyat yuritayotgan savdo maydonchalarining joylashuvi va ularning aniq manzillari alohida ko‘rsatib o‘tilmoqda.

Bir vaqtning o‘zida birjaning mana shu savdo maydonchalari orqali fermerlar va klasterlarni akkreditatsiyadan o‘tkazish jarayonlari ham amalga oshirilmoqda.

Seminarlar ochiq muloqot shaklida o‘tkazilib, sohalar mutaxassislari fermerlar va klasterlarning barcha savollariga javob berishmoqda.

Manba: Ommaviy kommunikatsiyalar va tashqi iqtisodiy faoliyat bo‘limi