Joriy yilning 12-iyun kuni birjaning Markaziy apparati binosida “Birja a’zolari tomonidan jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida ichki nazoratni tashkil etish va amalga oshirish tartibi” to‘g‘risida o‘quv-amaliy seminar tashkil etildi.

“O‘zRTXB” AJ Komplayens-nazorat va axborot xavfsizligi Bosh boshqarmasi tashabbusi bilan tashkil etilgan seminarda birja a’zolari, markaziy apparat xodimlari hamda hududiy filiallarda faoliyat yurituvchi birja a’zolari ZOOM videokonferensiya dasturi orqali ishtirok etdi.

Seminarda, “O‘zRTXB” AJ Boshqaruv raisining birinchi o‘rinbosari K. Xudayberdiyev so‘zga chiqib Birja a’zolari tomonidan jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida mamlakatimizda so‘nggi yillarga keng ko‘lamli ishlar amalga oshirilayotganligini va bunday turdagi iqtisodiy jinoyatlarning har qanday ko‘rinishlariga qatʼiy murosasizlik madaniyatini shakllanayotgani hamda iqtisodiy jinoyatlarga qarshi kurashish bo`yicha samarali ishlar amalga oshirilayotganligini aytib o‘tdi.

Shundan so‘ng, O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti xodimi M. Sultonov so‘zga chiqib seminar ishtirokchilariga ichki nazoratni o‘tkazish tartibi, mijozlarni lozim darajada tekshirish hamda shubhali operatsiyalar haqida xabar berish tartibi to‘g‘risida ma’lumot berib o‘tdi.

Shu bilan birga, shubhali operatsiyalar to‘g‘risida vakolatli organlarga xabar bermaslik jinoiy javobgarlikni keltirib chiqarishi mumkinligi seminar ishtirokchilariga tushuntirishlar berib o‘tdi.

O‘quv seminari davomida birja a’zolari tomonidan jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida tayyorlangan savolnomadagi savollarga atroflicha javob berildi.

Seminar so‘ngida “O‘zRTXB” AJ Boshqaruv raisining birinchi o‘rinbosari K. Xudayberdiyev so‘zga chiqib, Boshqaruv raisining tegishli buyrug‘iga binoan birja savdolarida qо‘shimcha dasturlardan foydalanganligi uchun Intizom komissiyasi tomonidan intizomiy javobgarlikka tortilgan birja a’zolari tо‘g‘risidagi ma’lumotlarni birjaning “uzex.uz” rasmiy saytida doimiy joylashtirib borish amaliyoti yо‘lga qо‘yilganligini seminar ishtirokchilariga ma’lum qildi.

Seminar ochiq muloqot shaklida o‘tkazilib, soha mutaxassislari tinglovchilarning barcha qiziqtirgan savollariga javob berishdi va o‘z navbatida ishtirokchilar o‘tkazilgan seminar foydali bo‘lganini maʼlum qildilar.

Manba: Ommaviy kommunikatsiyalar va tashqi iqtisodiy faoliyat bo‘limi