2026-yil 12-mart kuni Surxondaryo viloyatida O‘zbekiston respublika tovar-xom ashyo birjasi rahbariyati hamda mahalliy tadbirkorlar, fermer va dehqon xo‘jaliklari vakillari ishtirokida biznes-seminar bo‘lib o‘tdi.

Mazkur tadbir O‘zbekiston Respublikasi Prezidenti va Vazirlar Mahkamasining topshiriqlariga muvofiq, Oltinsoy tuman hokimligi bilan hamkorlikda tashkil etildi.

Biznes-seminarda respublikaning turli hududlaridan meva-sabzavot yetishtirish va qayta ishlash sohasida faoliyat yuritayotgan 50 nafar tadbirkor va fermer Surxondaryo viloyatining Oltinsoy tumaniga tashrif buyurdi. Tadbir davomida ishtirokchilar tajriba almashib, qishloq xo‘jaligi mahsulotlarini qayta ishlash orqali qo‘shimcha qiymat yaratish va o‘zaro manfaatli hamkorlik aloqalarini yo‘lga qo‘yish masalalarini muhokama qildilar.

Shuningdek, seminar doirasida ishtirokchilarga O‘zbekiston respublika tovar-xom ashyo birjasining zamonaviy elektron savdo instrumentlari bo‘yicha ham taqdimotlar o‘tkazildi.

Xususan, fermer va dehqon xo‘jaliklariga qishloq xo‘jaligi mahsulotlarini erkin bozor narxlarida realizatsiya qilish uchun mo‘ljallangan birjaning yangi elektron savdo platformasi – UZEX Agro imkoniyatlari haqida ma’lumot berildi.

Shu bilan birga, birjaning yarmarka.uzex.uz elektron ko‘rgazma-yarmarka savdo platformasi orqali mahsulotlarni tashqi bozorlarga, jumladan Afg‘onistonga eksport qilish mexanizmlari batafsil tushuntirildi.

Seminar yakunida, tadbirkorlardan kelib tushgan murojaat va takliflarga javoblar berildi, tadbirkorlarning birja faoliyatidagi ishtiroki yuzasidan maslahatlar va amaliy yordamlar ko‘rsatildi.

Manba: Ommaviy kommunikatsiyalar va tashqi iqtisodiy faoliyat bo‘limi