22-noyabrda Kobul shahrida Afg‘onistonning Ghazanfar Bank banki taʼsischiligida O‘zbekiston respublika tovar-xom ashyo birjasining xorijiy savdo maydonchasi o‘z faoliyatini boshladi.

Mazkur xorijiy savdo maydonchasi Kobul shahrida o‘tkazilgan “Imom Abu Hanifa 4-milliy va xalqaro ko‘rgazma va savdo yarmarkasi” doirasida ishga tushirildi.

Tadbirda O‘zbekiston respublika tovar-xom ashyo birjasi delegatsiyasi ishtirok etib, uning vakillari Afg‘onistonning Ghazanfar Bank banki masʼul xodimlariga birja sertifikatlarini topshirishdi.

Birjaning savdo maydonchasi O‘zbekiston va Afg‘oniston tadbirkorlari uchun bozor mexanizm afzalliklaridan foydalangan holda ikki mamlakat tovar bozorlarida erkin ishtirok etish imkoniyatini yaratadi.

Mazkur afzalliklarga birja savdolari va hisob-kitoblarning shaffofligi, narxlarni bozor tamoyillari asosida shakllanishi, ishonchli kontragentlarning keng bazasi, tezkor va qulay biznes-jarayonlar, vaqt va mablag‘ning tejamkorligi hamda to‘lovlarni va tovarni yetkazib berishning kafolatlash kabi ustunliklar kiradi.

Birjaning yangi savdo maydonchasi mahalliy tovar ishlab chiqaruvchilarning eksport salohiyatini kengaytirish hamda O‘zbekiston va Afg‘oniston o‘rtasidagi o‘zaro savdo aylanmasining o‘sishiga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi