“O‘zbekiston respublika tovar-xom ashyo birjasi” AJda birja aʼzolari uchun ichki nazorat tizimini tashkil etish, moliyaviy operatsiyalar shaffofligini taʼminlash hamda birja savdolarida raqobat to‘g‘risidagi qonunchilik talablariga rioya etish masalalariga bag‘ishlangan o‘quv-amaliy seminar o‘tkazildi.

Tadbir doirasida yuqori likvidli va monopol turdagi mahsulotlarni birja savdolari orqali realizatsiya qilish tartibi ham atroflicha yoritildi. Xususan, mahsulotlarni savdoga qo‘yish grafiklariga rioya etish, sotuvchilarning majburiyatlarini bajarishi, savdolarni belgilangan talablar asosida tashkil etish va narxlarning sunʼiy oshirilishining oldini olish masalalari muhokama qilindi.

Shu bilan birga, birja savdolarida raqobatni cheklovchi harakatlarga yo‘l qo‘ymaslik, narx manipulyatsiyasi alomatlarini aniqlash va qonunbuzilish holatlari uchun belgilangan javobgarlik choralari yuzasidan tushuntirishlar berildi. Savdo jarayonlarida qonunchilik talablariga qatʼiy rioya qilish, bozor ishtirokchilari uchun teng raqobat sharoitlarini taʼminlash hamda savdolarning ochiqligi va shaffofligini oshirish muhimligi taʼkidlandi.

Seminar davomida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasidagi talablar, birja aʼzolarida ichki nazorat tizimini samarali tashkil etish hamda shubhali operatsiyalarni aniqlash va ular to‘g‘risida belgilangan tartibda xabar berish masalalari muhokama qilindi.

Seminar yakunida ishtirokchilarning savollariga javoblar berilib, mavzu yuzasidan fikr almashildi.

Manba: Ommaviy kommunikatsiyalar va tashqi iqtisodiy faoliyat bo‘limi