Joriy yil 30-noyabr kuni O‘zbekiston respublika tovar-xom ashyo birjasi O‘zbekiston Respublikasi Korrupsiyaga qarshi kurashish agentligi bilan hamkorlikda korrupsiyaga qarshi kurashish, manfaatlar to‘qnashuvi va odob-axloq qoidalari mavzusiga bag‘ishlangan amaliy seminar o‘tkazdi.

“O‘zbekiston respublika tovar xom-ashyo birjasi” AJ Komplayens-nazorat va korrupsiyaga qarshi kurashish boshqarmasi tomonidan tashkil etilgan yig‘ilishda birjaning markaziy apparat xodimlari bilan birga Zoom videokonferensiya dasturi orqali hududiy filiallar xodimlari ham ishtirok etdilar.

Tadbirda O‘zbekiston Respublikasi Korrupsiyaga qarshi kurashish agentligining masʼul xodimi Oybek Abdug‘aniyev O‘zbekistonda korrupsiyaga qarshi kurash sohasida keng ko‘lamli ishlar amalga oshirilayotganligi to‘g‘risida maʼruza qildi.

Taʼkidlanganidek, O‘zbekistonning yangilangan siyosati jamiyatda adolat va qonun ustuvorligini oliy darajaga ko‘tarish, zamonaviy va samarali davlat boshqaruvini joriy etish, davlat xizmatida korrupsiyaviy holatlarning har qanday ko‘rinishlariga qatʼiy murosasizlik madaniyati shakllanmoqda.

Xususan, korrupsiyaga qarshi kurashish samaradorligini kuchaytirish maqsadida O‘zbekiston Respublikasi Prezidentining 2017-yil 2-fevraldagi “Korrupsiyaga qarshi kurashish to‘g‘risida”gi O‘zbekiston Respublikasi Qonuni qabul qilindi hamda 2020-yil 29-iyundagi O‘zbekiston Respublikasi Prezidentining “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi Farmoni va “O‘zbekiston Respublikasi Korrupsiyaga qarshi kurashish agentligi faoliyatini tashkil etish to‘g‘risida”gi qaroriga asosan korrupsiyaga qarshi kurashishdagi maxsus davlat organi, yaʼni O‘zbekiston Respublikasi Korrupsiyaga qarshi kurashish agentligi tashkil etildi.

Shu bilan birga, bugungi kunda korrupsiyaga qarshi kurashish sohasidagi davlat siyosati O‘zbekiston Respublikasi Prezidentining 2023-yil 11-sentabr kuni 158-son farmoni bilan qabul qilingan “O‘zbekiston — 2030” strategiyasida ham o‘z aksini topgan.

Bugungi kunda korrupsiyaga qarshi kurashish sohasida ijobiy yutuqlarga erishgan rivojlangan davlatlarning bu boradagi tajribasi shuni ko‘rsatmoqdaki, korrupsiya ko‘rinishlarining oqibati bilan emas, balki uni keltirib chiqarayotgan sabablarni va shart-sharoitlarni bartaraf etishga asosiy eʼtibor qaratilganligi o‘z samarasini bermoqda.

Tadbir davomida, shuningdek, korrupsiyaga qarshi kurashish sohasida erishilgan yutuqlar va kutilayotgan o‘zgarishlar to‘g‘risida batafsil maʼlumotlar berildi.

Seminar yakunida birja xodimlari o‘zlarini qiziqtirgan savollarga javob oldilar.

Manbaa: "O'zRTXB" AJ PR bo'limi