O‘zbekiston Respublikasi Prezidentining 2024-yil 4-dekabrdagi PQ-421-son qarori ijrosini taʼminlash doirasida jamoaviy sport turlariga yoshlarni keng jalb qilish va iqtidorli sportchilarni saralab olish (seleksiya) hamda yuqori mahoratli sportchilarni tayyorlash tizimini takomillashtirish maqsadida 2025-yil 27-28-fevral kunlari O‘zbekiston regbi federatsiyasi “O‘zbekiston respublika tovar-xom ashyo birjasi” AJ bilan hamkorlikda Xalqaro xotin-qizlar kuniga bag‘ishlangan 15 yoshgacha bo‘lgan qizlar o‘rtasida regbi-7 bo‘yicha anʼanaviy respublika musobaqasi (U-15) ni tashkil etdi.

Musobaqada Toshkent, Toshkent viloyati, Buxoro, Sirdaryo, Namangan, Farg‘ona, Andijon, Surxondaryo, Xorazm, Amudaryo, Qoraqalpog‘iston, Navoiy viloyatlaridan yosh regbichilardan iborat jamoalar ishtirok etishdi. Bu esa o‘z navbatida regbi mamlakatimizda qaytmas surʼatlar bilan rivojlanayotganligi va unga bo‘lgan qiziqish tobora ortib borayotganining yana bir isbotidir.

Turnir World Rugby qoidalariga muvofiq o‘tkazildi. Uning asosiy maqsadi O‘zbekistonda ayollar regbisini rivojlantirish, yoshlar orasida bu sport turini ommalashtirish, shuningdek, sportchi qizlarning mahorati va malakasini oshirishdan iborat.

Bayram musobaqasi ko‘tarinki ruhda va do‘stona raqobatda o‘tkazildi. Mamlakatimizning turli viloyatlaridan tashrif buyurgan ko‘plab ishqiboz va muxlislar o‘zlarining sevimli jamoasini qo‘llab-quvvatlash uchun mehmon sifatida qatnashdilar.

Qizg‘in bahslarga boy bo‘lgan bellashuvlarda har bir jamoa vakillari o‘zaro kuch sinashda kuchli jismoniy, aqliy qobiliyatlari va irodaviy hislatlarini namoyish etishga muvaffaq bo‘ldilar.

Ushbu tadbir tajriba almashish, iqtidorli o‘yinchilarni aniqlash va respublikada regbining nufuzini yana-da mustahkamlash uchun muhim maydon bo‘lib xizmat qiladi.

G‘olib va sovrindorlar tadbir tashkilotchilari tomonidan tegishli tarzda diplom, kubok hamda qimmatbaho sovg‘alar bilan taqdirlandilar.

Manba: Ommaviy kommunikatsiyalar va tashqi iqtisodiy faoliyat bo‘limi