Birja savdolarida shaffoflikni yanada oshirish, birja faoliyatini amalga oshirish uchun belgilangan talablarni takomillashtirish hamda tizimda raqamli texnologiyalarni keng tatbiq etish maqsadida Vazirlar Mahkamasining 2024-yil 12-sentabrdagi “Birja savdolariga ilg‘or axborot texnologiyalarini keng joriy etish hamda sohada raqamlashtirish jarayonlarini izchil davom ettirish chora-tadbirlari to‘g‘risida” 570-son qarori qabul qilindi.

Qarorga ko‘ra 2024-yil 1-noyabrdan boshlab tovar-xom ashyo birjalar faoliyatini litsenziyalashga yangi talablar belgilanmoqda.

Shuningdek, quyidagilar O‘zbekiston respublika tovar-xom ashyo birjasi faoliyatini rivojlantirishning asosiy ustuvor yo‘nalishlari etib belgilandi:

birja savdolari shaffofligi hamda axborot xavfsizligini ta’minlash;

birja axborot texnologiyalari infratuzilmasini yanada takomillashtirish, elektron savdo platformalarini doimiy ravishda modernizatsiya qilib borish;

birja xodimlari va a’zolarining malakasini oshirish, joylarda savdo ishtirokchilari orasida birja mexanizmlarini keng targ‘ib qilish;

tovar derivativlari hamda qarama-qarshi auksion savdolarini amaliyotga joriy etish choralarini ko‘rish.

Shuningdek, qaror bilan birja faoliyatini kengaytirish, sohaga yangi moliyaviy vositalarni joriy qilish hamda savdo ishtirokchilariga yanada qulayliklar yaratish bo‘yicha “Yo‘l xaritasi” tasdiqlangan.

Mazkur qarorning to‘liq matni bilan “O‘zRTXB” AJ rasmiy vebsaytining Me’yoriy-huquqiy aktlar bo‘limida tanishib chiqishingiz mumkin.

Manba: Ommaviy kommunikatsiyalar va tashqi iqtisodiy faoliyat bo‘limi