O‘zbekiston respublika tovar-xom ashyo birjasi vakillari Cbonds-Congress moliya bozorlari bo‘yicha biznes-anjumanlar tashkilotchi kompaniyasi tomonidan tashkil etilgan “O‘zbekiston respublikasi kapital bozori” V-xalqaro konferensiyasida ishtirok etdi.

Xalqaro anjumanda nazorat qiluvchi organlar, mahalliy banklar, investitsiya kompaniyalari, ishlab chiqarish korxonalari, shuningdek, xalqaro moliya institutlari, reyting agentliklari va infratuzilma kompaniyalarining 200 dan ortiq vakillari ishtirok etdi.

Tadbir doirasida O‘zbekiston respublika tovar-xom ashyo birjasining video taqdimoti bo‘lib o‘tdi, unda birjaning so‘nggi yutuqlari va istiqbolli loyihalari haqida batafsil maʼlumot berildi.

Taʼkidlanganidek, rivojlangan birja infratuzilmasi va samarali korporativ boshqaruv evaziga kompaniyaning yuqori rentabelligiga erishilgan. Xususan, so‘nggi yillarda O‘zbekiston respublika tovar-xom ashyo birjasining sof daromadi, dividend to‘lovlarining hajmlari va aksiyalariga bo‘lgan talabning o‘sish tendensiyasi kuzatilmoqda.

Xorijiy ekspertlar va konsalting kompaniyalar ishtirokida ishlab chiqilgan O‘zbekiston respublika tovar-xom ashyo birjasining rivojlantirish strategiyasida IT-infratuzilma va savdo platformalarni modernizatsiya qilish, ko‘rsatilayotgan birja xizmatlarining turlarini kengaytirish, tashqi savdo hajmlarini oshirish hamda yangi birja savdo vositalari, shu jumladan tovar derivativlarini joriy etish kabi muhim vazifalar o‘z aksini topgan.

Taqdimot yakunida tadbir ishtirokchilari o‘rtasida O‘zbekistonda birja sohasini yana-da rivojlantirish masalalari yuzasidan ochiq muloqot bo‘lib o‘tdi.

Manba: Ommaviy kommunikatsiyalar va tashqi iqtisodiy faoliyat bo‘limi