O‘zbekiston respublika tovar-xom ashyo birjasining davlat xaridlari bo‘yicha elektron savdo tizimi etender.uzex.uz da davlat buyurtmachilari tomonidan malakali xarid qilish tartib-taomillari ishtirokchilarini tanlab olish imkoniyatini beruvchi dastlabki malaka tanlovi tartib-taomili joriy etildi.

Mazkur tartibga ko‘ra ishtirokchilar quyidagi mezonlarga muvofiq bo‘lishi kerak:

• shartnomani bajarish uchun zarur texnik, moliyaviy, moddiy, kadrlar resurslarining hamda boshqa resurslarning mavjudligi;
• shartnoma tuzish uchun qonuniy huquqqa egaligi;
• soliqlar va yig‘imlarni to‘lash bo‘yicha muddati o‘tgan qarzdorlikning mavjud emasligi;
• o‘ziga nisbatan joriy etilgan bankrotlik tartib-taomillarining mavjud emasligi;
• insofsiz ijrochilarning yagona reyestrida qayd etilmaganligi.

Bunda, xarid ishtirokchilari davlat buyurtmachilarining malaka talablariga asosan o‘zlarining takliflarini elektron tizimga biriktirgan holda malaka tanlovidan o‘tishadi.

Xarid komissiyasi, ishtirokchilar takliflarining malaka talablariga muvofiqligi yoki muvofiq emasligi natijalarini hisobga olgan holda qaror qabul qiladi. Malaka tanlovining natijalari bo‘yicha maʼlumotlar elektron bayonnomada shakllanadi.

Manba: Ommaviy kommunikatsiyalar va tashqi iqtisodiy faoliyat bo‘limi