2023-yil 17-oktabrda O‘zbekiston respublika tovar-xom ashyo birjasining birja savdolariga artemiya sistasi mahsuloti qo‘yila boshlandi. Ushbu yangi birja tovarini sotuvchisi sifatida “Aral Artemiya Sanaat” MChJ ishtirok etmoqda.

Hozirgi paytda ushbu mahsulotni ichki birja savdolari uchun 89889-son shartnomasi ochilgan. Unga muvofiq mahsulotning bir tonnasi boshlang‘ich narxi – 103 250 000 so‘mni, bir lot 20 tonnani tashkil qiladi. Tovarni yetkazib berish sharti – EXW, yaʼni sotuvchining omboridan olib ketish hisoblanadi.

Dastlabki kunda birja savdolari orqali 20 tonna artemiya sistasi deyarli 6,1 mlrd so‘mga sotildi. Shu bilan birga, yangi mahsulotning birja kotirovkasi bir tonna uchun 304 750 000 so‘mni tashkil etdi.

Savdolar erkin, oshkora va barcha toifadagi xaridorlarga birja savdolarida qatnashish imkoniyati teng taʼminlangan holda o‘tkazilmoqda. Birjada yangi mahsulotning paydo bo‘lishi bozorda raqobatning rivojlanishiga o‘z hissasini qo‘shadi.

Maʼlumot uchun: Dunyo tajribasida artemiya sistalari asosida olingan mahsulotlar 5 ta sohada, yaʼni akvamadaniyat sanoatida, qishloq xo‘jaligida, farmatsevtika, tibbiyot va kosmetologiyada keng qo‘llaniladi.

Manbaa: "O'zRTXB" AJ PR bo'limi