2024-yil 10-yanvar kuni birja savdolari bo‘yicha xalqaro ekspert Lamon Ratten O‘zbekiston respublika tovar-xom ashyo birjasiga tashrif buyurdi.

Tashrifdan ko‘zlangan asosiy maqsad mahalliy mutaxassislar, brokerlar va tadbirkorlarga zamonaviy birja savdo vositalarini shakllantirish va rivojlantirish bo‘yicha maslahatlar berishdan iborat edi.

Tashrif doirasida xalqaro ekspert va O‘zbekiston respublika tovar-xom ashyo birjasi rahbariyati o‘rtasida uchrashuv bo‘lib o‘tdi.

Taʼkidlanganidek, xalqaro ekspertlar bilan yaqindan o‘zaro hamkorlik qilish birja faoliyatini yana-da rivojlanishining muhim shartlaridan biri hisoblanadi.

Uchrashuvda birja faoliyatiga oid prezentatsion videorolik namoyish etildi. Shu bilan birga, Lamon Ratten O‘zbekiston birjasining shakllanish va rivojlanish tarixi, unda sotiladigan tovar aktivlari, birja savdolari va o‘zaro hisob-kitoblar mexanizmi, birja faoliyatida axborot texnologiyalarini joriy etish amaliyotlari hamda birjaning joriy holati va istiqboldagi rejalari bilan tanishdi.

O‘z navbatida, xorijlik mehmon O‘zbekiston respublika tovar-xom ashyo birjasi faoliyatiga yuqori baho berib, birja faoliyatining tarixi O‘zbekistonda bozor munosabatlari barqaror rivojlanib kelayotganidan dalolat berishini taʼkidlab o‘tdi.

Ekspertning fikricha, mamlakatimiz rahbariyati tomonidan faol qo‘llab-quvvatlanayotgan birjaning yangi loyihalari alohida eʼtiborga loyiq. Bunga, xususan, yangi birja vositalari, shu jumladan paxta xomashyosi bo‘yicha joriy qilingan fyuchers shartnomalari kiradi.

Tashrif doirasida Lamon Ratten mahalliy mutaxassislar, brokerlar, tadbirkorlar va fermerlar uchun ochiq muloqot shaklida amaliy seminar ham o‘tkazdi.

Trening davomida ekspert derivativlar bozori mexanizmining o‘ziga xos xususiyatlari hamda uning rivojlanishining huquqiy, tashkiliy va texnik jihatlari haqida batafsil tushuntirib berdi.

Shuningdek, birjada tuzilgan bitimlar bo‘yicha majburiyatlarni bajarish, derivativlarni soliqqa tortish, xatarlar va foyda nisbati, savdo ishtirokchilarini o‘qitish va bozor likvidligini taʼminlash masalalari ham muhokama qilindi.

Seminar ishtirokchilari o‘zlarini qiziqtirgan savollarga malakali javob oldilar hamda olingan maʼlumotlarning foydali va amaliy ahamiyatga ega ekanligini taʼkidladilar.

Maʼlumot uchun: Lamont Ratten – birja savdolari bo‘yicha xalqaro ekspert. Ish faoliyati davomida xalqaro tashkilotlarda turli lavozimlarda ishlagan, shu jumladan BMT va Jahon bankining loyihalarida ishtirok etgan. Hindiston ko‘p tarmoqli tovar birjasi (МСХ) boshqaruvchi direktori (2003-2015-y.) va Indoneziya tovar va derivativ birjasi (ICDX) prezidenti (2017-2022-y.).

Manba: Ommaviy kommunikatsiyalar va tashqi iqtisodiy faoliyat bo‘limi