2023 yilning 23-25 oktyabr kunlari Mo‘g‘uliston tovar birjasi (MCE) delegatsiyasi O‘zbekiston respublika tovar-xom ashyo birjasiga  Ijrochi direktori Batsayxan Send boshchiligida amaliy tashrif uyushtirdi.

Uchrashuv boshida birjaga tashrif buyurganlar uchun O‘zbekiston respublika tovar-xom ashyo birjasi faoliyati to‘g‘risidagi prezentatsion videorolik namoyish etildi. Xususan, ular O‘zbekiston birjasini tashkil topish va rivojlanish tarixi, unda sotiladigan tovar aktivlari, hamda UZEX birjasining zamonaviy holati va istiqbolli rejalari to‘g‘risida maʼlumotga ega bo‘ldilar.

Bundan so‘ng, O‘zbekiston respublika tovar-xom ashyo birjasi va Mo‘g‘uliston tovar birjasi o‘rtasida O‘zaro anglashuv memorandumi imzolandi. Mazkur memorandum tomonlar o‘rtasida birjalararo hamkorlikni kengaytirishga, birja savdolari bo‘yicha o‘zaro axborot va tajriba almashish hamda birja savdo vositalaridan foydalangan holda ikki mamlakat o‘rtasidagi tovar aylanmasini oshirishga qaratilgan.

Tashrif doirasida UZEX birjasi xodimlari birjaning savdo platformalari, birja aʼzolari va savdo ishtirokchilarning akkredatsiyadan o‘tkazish tartibi, birja va auksion savdolar mexanizmi to‘g‘risida ham batafsil maʼlumot taqdim etdilar. Birja tomonidan ham yirik tovar ishlab chiqaruvchilar, ham kichik biznes va xususiy tadbirkorlik subyektlari uchun taqdim etilgan afzalliklari to‘g‘risida ham so‘z yuritildi.

Shuningdek, mehmonlar birjaning asosiy savdo zaliga kirib, birja savdolari jarayonini kuzatdilar, hamda mijozlarga hisob-kitob kliring xizmat ko‘rsatish mexanizmini o‘rganib chiqdilar. So‘ngra, ko‘rgazma-yarmarka savdolari, davlat xaridlari, avtoraqamlar va mobil raqamlarni sotish bo‘yicha elektron savdo tizimlarning taqdimotlari o‘tkazildi.

O‘z navbatida Mo‘g‘uliston delegatsiyasining aʼzolari O‘zbekiston birjasi faoliyatiga yuqori baho berib, birja savdolari O‘zbekistonda narxlarni shaffof tarzda shakllanishida muhim ahamiyatga ega bozor mexanizmi ekanligini taʼkidladilar. 

Uchrashuv yakuniga ko‘ra, tomonlar imzonlangan memorandum doirasida birjalararo aloqalarni yana-da faollashtirishga kelishib oldilar.

Manbaa: "O'zRTXB" AJ PR bo'limi