2023-yil 4-may kuni Qozog‘istonning oziq-ovqat, qurilish, neft, kimyo, IT va farmatsevtika sohalaridagi 24 ta kompaniyalari vakillari O‘zbekiston respublika tovar-xom ashyo birjasi (O‘zRTXB)ning markaziy ofisiga tashrif buyurdilar.

Qozog‘istonlik tadbirkorlarining O‘zbekistonga tashrifi Qozog‘iston va O‘zbekiston korxonalari o‘rtasida to‘g‘ridan-to‘g‘ri aloqalar o‘rnatish va savdo aloqalarini faollashtirish maqsadida tashkil etilgan qo‘shma biznes-forum doirasida bo‘lib o‘tdi.

Uchrashuv boshida birjaga tashrif buyurganlar uchun birja faoliyati to‘g‘risidagi prezentatsion videorolik namoyish etildi. Mehmonlar O‘zbekiston birjasini tashkil topish va rivojlanish tarixi, birja vositalari, hamda UZEX birjasining zamonaviy holati va istiqbolli rejalari to‘g‘risida maʼlumotga ega bo‘ldilar.

Tashqi savdo bitimlarini tuzishda birja mexanizmlarining afzalliklari va imkoniyatlari alohida eʼtirof etildi. Taʼkidlanganidek, birjaning savdo tizimlari savdo va hisob-kitoblarning shaffofligi, ishonchli tovar ishlab chiqaruvchilar bilan bevosita aloqa o‘rnatish, vaqt va mablag‘ tejamkorliligi, shuningdek to‘lovlarni va tovarni yetkazib berishning kafolatlash kabi afzalliklarga ega.

Uchrashuv yakunlari bo‘yicha birja mexanizmlaridan foydalangan holda savdo imkoniyatlarini kengaytirish sohasida B2B formatida boshlangan hamkorlik muloqotlarini davom ettirish bo‘yicha kelishuvga erishildi.

Manba: Ommaviy kommunikatsiyalar va tashqi iqtisodiy faoliyat bo‘limi