V Toshkent xalqaro investitsiya forumi (TIIF-2026) doirasida O‘zbekiston respublika tovar-xom ashyo birjasi (UZEX) rahbariyati hamda AQSHning “NASDAQ birjasi” moliyaviy texnologiyalar bo‘yicha direktori Dmitriy Zelensov o‘rtasida uchrashuv bo‘lib o‘tdi.

Maʼlumot uchun: “NASDAQ birjasi” jahonning yetakchi birjalaridan biri va innovatsion birja texnologiyalarining global provayderi bo‘lib ikki birja o‘rtasidagi strategik hamkorlik O‘zbekiston birja bozorini xalqaro moliyaviy infratuzilmaga integratsiya qilish hamda ilg‘or texnologiyalarni joriy etish uchun mustahkam asos yaratmoqda.

Uchrashuvda tomonlar tovar derivativlari bozorini rivojlantirish istiqbollari yuzasidan fikr almashdilar. Jumladan, fyuchers savdolarini joriy etish, narx xatarlarini boshqarish bo‘yicha zamonaviy xedjirlash mexanizmlarini qo‘llash, shuningdek, birja infratuzilmasini modernizatsiya qilish, savdo platformalari, kliring hamda risk-menejment tizimlarini rivojlantirish masalalari muhokama qilindi.

Xorijiy mehmon O‘zbekiston Respublikasi Prezidenti rahbarligida amalga oshirilayotgan bozor iqtisodiyoti tamoyillarini mustahkamlash va investitsiyalarni faol jalb etishga qaratilgan keng ko‘lamli iqtisodiy islohotlarni yuqori baholadi. Shuningdek, u shaffof va samarali bozor mexanizmlarini joriy etishda muhim o‘rin tutayotgan UZEX birjasining faoliyati va erishgan natijalarini alohida eʼtirof etdi.

Muloqot chog‘ida mahalliy biznesning xalqaro moliyaviy vositalardan foydalanish imkoniyatlarini kengaytirish va ilg‘or jahon tajribasini milliy sharoitlarga moslashtirishga qaratilgan UZEX taraqqiyot strategiyasiga alohida eʼtibor qaratildi.

Uchrashuv yakunlariga ko‘ra, tomonlar faol ishchi muloqot va ekspertlik hamkorligini davom ettirish bo‘yicha kelishib oldilar. NASDAQ va UZEX o‘rtasidagi hamkorlik zamonaviy birja texnologiyalarini joriy etish, bozor infratuzilmasini rivojlantirish va UZEXning xalqaro raqobatbardoshligini oshirishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi