2026-yil 17-sentabr kuni O‘zbekiston respublika tovar-xom ashyo birjasi (UZEX) Boshqaruv raisi Asadulla Qayumov va Interkontinental birja (ICE)ning Osiyo-Tinch okeani mintaqasi (APAC) bo‘yicha direktori Mariya Levanti o‘rtasida uchrashuv bo‘lib o‘tdi.

Uchrashuv davomida UZEX va ICE o‘rtasidagi hamkorlikning joriy holati va istiqbollari, shuningdek, O‘zbekistonda zamonaviy derivativlar bozorini rivojlantirish masalalari muhokama qilindi.

Alohida eʼtibor O‘zbekiston biznesining ICE fyuchers bozorlariga chiqish hamda tovar bozori ishtirokchilari uchun zamonaviy xedjirlash vositalaridan foydalanish imkoniyatlarini oshirish masalalariga qaratildi.

Xususan, UZEX GLOBAL loyihasi doirasida mahalliy fermerlar va to‘qimachilik korxonalari uchun ICE birjasining paxta fyucherslaridan xedjirlash maqsadida foydalanish imkoniyatlari muhokama qilindi.

Shuningdek, ICE ekspertlari ishtirokida O‘zbekiston tadbirkorlari uchun maxsus seminarlar tashkil etish, xedjirlash amaliyoti va derivativlar bilan ishlash bo‘yicha professional kompetensiyalarni oshirish masalalari bo‘yicha fikr almashildi.

Uchrashuv yakunida tomonlar muntazam ekspertlik muloqotlarini yo‘lga qo‘yish va yangi qo‘shma tashabbuslarni amalga oshirish bo‘yicha hamkorlikni izchil davom ettirishga kelishib oldilar.

Manba: Ommaviy kommunikatsiyalar va tashqi iqtisodiy faoliyat bo‘limi