Joriy yil 29-aprel kuni “O‘zbekiston respublika tovar-xom ashyo birjasi” AJ va Yagona integrator “UZINFOCOM” MChJ o‘rtasida o‘zaro hamkorlik to‘g‘risida memorandum imzolandi.

Imzolangan memorandum O‘zbekiston respublika tovar-xom ashyo birjasining savdo tizimi orqali domen nomlari onlayn auksion savdolarini tashkillashtirishni nazarda tutadi.

Mazkur hujjat doirasida birjaning axborot tizimida xaridorgir harflar va raqamlar kombinatsiyasiga ega bo‘lgan “.UZ” domenidagi foydalanilmayotgan domen nomlari bo‘yicha boshlang‘ich narxni oshirish asosida elektron auksionlar o‘tkaziladi.

Shu bilan birga, tomonlar o‘rtasida kiberxavfsizlikni taʼminlash, birjada axborot-kommunikatsiya texnologiyalari sohasida xodimlarning malakasini oshirish bo‘yicha hamkorlikni yo‘lga qo‘yish va tajriba almashishga ham kelishib olindi.

 

Maʼlumot uchun: UZINFOCOM davlat axborot tizimlarini yaratish va qo‘llab-quvvatlash bo‘yicha yagona integrator va .UZ domeni maʼmuri hisoblanadi.

Manbaa: "O'zRTXB" AJ PR bo'limi