20-sentabr kuni O‘zbekiston respublika tovar-xom ashyo birjasining bosh ofisida O‘zbekiston respublikasi yoshlar ittifoqi huzuridagi “Mehrli qo‘llar” imkoniyati cheklangan yoshlar va bolalar markazining “Mening mehnatim” xayriya yarmarkasi bo‘lib o‘tdi.

Tadbirda Markaz va Birja vakillari, imkoniyati cheklangan bolalar va yoshlar, jurnalistlar, ko‘ngillilar va boshqa g‘amxo‘r insonlar ishtirok etdi.

Yarmarkada imkoniyati cheklangan bolalar va yoshlarning ijod namunalari namoyish etildi, “Pochemuchka” markazi to‘garagida tahsil olayotgan imkoniyati cheklangan bolalarning chiqishlari, “Robokidz” robototexnika maktabining mahorat saboqlari o‘tkazildi.

Taʼkidlanganidek, Markazning O‘zbekiston respublika tovar-xom ashyo birjasi bilan hamkorligida uzoq yo‘llar davomida olib borayotgan ishlardan ko‘zlangan asosiy maqsad nogironligi bo‘lgan yoshlarga ko‘mak berish va ularning manfaatlarini himoya qilish, ularni har tomonlama qo‘llab-quvvatlash hamda ular uchun jamiyatda teng huquqli sharoitlar yaratishdan iboratdir.

O‘tkazilgan yarmarka bolajonlar va yoshlar qalbini zavq va shodlikka to‘ldirdi. Xayriya yarmarkasi doirasida sovg‘a-salomlarning tantanali taqdimoti ham bo‘lib o‘tdi, yarmarka mehmonlari va ishtirokchilari uchun bayram dasturi va ziyofatlar uyushtirildi.

 

Manba: Ommaviy kommunikatsiyalar va tashqi iqtisodiy faoliyat bo‘limi