2022-yil 19-may kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida “G‘alla yetishtirish va sotish bo‘yicha boshlangan islohotlarning eng muhim bosqichi va kutilayotgan o‘zgarishlarning tafsilotlari” mavzusida Moliya, Iqtisodiy taraqqiyot va kambag‘allikni qisqartirish, Qishloq xo‘jaligi vazirliklari va “O‘zbekiston respublika tovar-xom ashyo birjasi” AJ ning matbuot anjumani tashkil etildi va tadbir markaziy telekanallarda to‘g‘ridan-to‘g‘ri efir orqali namoyish etildi.

Anjumanda ta’kidlanganidek, joriy yil 11-may kuni O‘zbekiston Respublikasi Prezidenti tomonidan o‘tkazilgan yig‘ilishlarida g‘allani davlat tomonidan sotib olish va sotishda bozor narxlariga o‘tilishining muhim vazifalar belgilandi.

Ularga muvofiq fermer va klasterlarning g‘alla mahsulotlari ochiq birja savdolari orqali sotilishi tumanlar darajasida yo‘lga qo‘yiladi va buning uchun barcha shart-sharoitlar yaratiladi.

Xususan fermer va klasterlar tumanlarda tashkillashtirilgan birjaning savdo maydonchalari orqali ro‘yxatdan o‘tkaziladi va ularning bug‘doy mahsulotlari hech qanday cheklovlarsiz elektron birja savdolariga qo‘yladi va sotiladi.

Shuningdek, 2022-yilda “O‘zdonmahsulot” AK tizimi korxonalarida vaqtincha saqlangan 500 ming tonna bug‘doyni fermer xo‘jaliklari va g‘allachilik klasterlari birja savdolarga chiqarishda birja to‘lovlari hamda garov pulidan ozod qilinadi.

Ayni paytda g‘allachilik sohasida kutilayotgan yangiliklarning mazmun-mohiyati hamda birja savdolarida ishtirok etish tartibini tushuntirish maqsadida respublikamizning barcha hududlarida O‘zbekiston respublika tovar-xom ashyo birjasi tomonidan fermer va klasterlar uchun maxsus uyushtirilayotgan o‘quv seminarlari boshlandi. Seminarlar davomida fermer va klasterlarni birjadan ro‘yxatdan o‘tkazish va brokerlarni biriktirish ishlari ham olib borilmoqda.

Shu bilan birga, fermer, klaster va boshqa savdo ishtirokchilarini birja savdolari va brokerlik kasbiga o‘qitish bo‘yicha doimiy o‘quv kurslari yo‘lga qo‘yiladi. Bunda maxsus yaratilgan savdo simulyatorlaridan foydalaniladi va malakali mutaxassislar jalb qilinadi.

Matbuot anjumani davomida vazirlik va idoralari hamda O‘zbekiston respublika tovar-xom ashyo birjasining rahbarlari va mutaxassislari jurnalistlarni qiziqtirgan savollariga javob berishdi.

Manbaa: "O'zRTXB" AJ PR bo'limi